5 جويلية…. العيد الديني؟ ….العيد الوطني الأمل…

هل الأمل وهم سيكولوجي كما يقول البعض؟

بمناسبة عيد الإستقلال الوطني الواحد والستين للجزائر الحرة… صح عيدكم جميعا …. ماتزعفوش عليا ،5 جويلية هو العيد اللي نامن بيه …ماشي أعياد أخرى….لأنو وفر لنا قطعة نتاع ارض من بين كل الشعوب الأخرى ، باش نعيشو فيها بآمان… أحرار…. اما العيد نتاع قتل الحيوانات؟ مازال عندي مشكل معاه وفي رايي هو توظيف ميتافيزيقي وسياسي، واجتماعي دفين باش الناس تاكل اللحم والأمر برمته ما عندو حتى علاقة بالإيمانيات …. لكن مؤكد أنو عندو علاقة كبيرة مع الكرشة والعصبان…… لوكان كان العيد عندو علاقةمع التشجير ولا تنظيف المحيط مثلا هل كان رايح يلقى نفس التجاوب؟؟ … لنكن صرحاء ….

أنا ضد قتل اي حيوان بريء بهذه الصفة ، مهما كانت الذرائع…… ماتزعفوش مني رجاءا… أفضل أن يقدم الناس لبعضهم البعض في العيد وردة، احتضان، ابتسامة نقية، أمنيات طيبة بالخير والسعادة احسن من البطاين والهيدورات وانهار الدم ،والروائح المنتشرة….في كل مكان بحجة إرضاء الخالق الذي لم يقل بذلك ابداااا.

الحقيقة هي ان لنا بلد اسمه الجزائر ضحاو عليه رجالا صحاح… ماشي خرطي…. لازم يشعر الناس بعظمة هذا الإنجاز الفريد

هل الأمل بغد افضل هو مجرد وهم سايكولوجي؟ ….

في رأيي لا….. لكن بشرط….: يكون عندنا أمل في ان كل شيئ سيكون على مايرام غدااا بلاما يفصلنا هذا عن الواقع اللي يقول بللي الحية شوية صعيبة مخلطةوتتطلب منا الجهد الكبير والوعي خاصة….؟؟؟! ….

علاش مهم هذا الشي؟ …. مهم باش مايكونش الانتظار نتاعك لانهائي أو عبثي….. بلاما تتخذ نتايا أيها الإنسان خطوات عملية براغماتية…. تخاطر بكل شيئ في الحياة….باش الواقع نتاعك يتغير

في رايي لازم الانسان يلقى طريقة باش يستمتع بالحياة اليومية بكل تفاصيلها اليومية ……،بحٌب، وتوافق، وانسجام، ويسترجع الثقة بنفسو باش يتعامل مع الأزمات والمشاكل والآلام اللي يعيشها….. ومايبقاش يتجاهل الحاضر و يعيش؟على امل ممكن يكون كاذب على ان”القادم افضل”.. ومن بعد لاقدر الله يكتشف بللي الحياة نتاعو سرقاتو وفاتت بلخف ، ويلقى روحو كبر بسرعة رهيبة، وان كل شيء قد انتهى.!؟

لا…..ياصديقي…. رجاءا استمتع بكل لحظة حالية من حياتك، ابتسم في وجه أولادك وزوجتك… ووالدتك …. بكل عمق، وبكل شجاعة وكأن الحياة انتهت الآن……..وصدقني ستكون بألف مليار خير……..

ماتبقاش تنتظر في غد أفضل قد لايأتي أبدااااا …وتخلي الحياة تفلت من بيت يديك….

ماتخليش الأمل يتحول الى كابوس مرعب ؟! ومن بعد تحاول الهروب المستحيل من الواقع؟!!!

الأمل و الغد الأفضل هي أفكار موجودة في ريسانا فقط….. الحقيقة هي أروع وأصدق لحظة…..والوطن يبقى بعيدا عن أوهامك الشخصية….. أسمى من كل شيئ في الوجود…

مبروك عيدك ياجزائر … مجرد بقائك حرة مستقلة هو إعجاز جيوسياسي عظيم بالنظر لكل مايحاك….اذا اختلط عليك الأمر… الوطن أهم من كل شيئ على الإطلاق….

مبروك العيد وكثر خير الناس اللي ضحات….. ولتبقى الجزائر حرة ماطلعت الشمس… وأتمنى ان تتغير كل المناهج التربوية في الجزائر من اجل شيئ واحد فقط… الوطن هو أهم شيئ يجب الحفاظ عليه…. قبل الميتافيزيقيات التي تخضع للأهواء ولأجندات السلط …. الوطن اهم من كل شيئ….وليذهب الباقي الى الجحيم….

تحيا الجزائر…

MB – 05.07 2023 00:00