87
البارح في الشوط الأول يالخاوة، بلماضي طلعلي السكر والضغط الدموي وكل الأمراض الوعائية …. زعفت بزاف، والله غير في لحظة معينة قلت مانزيدش نتفرج، لأنو مايتعلمش، راسو يابس ومسنطح ، كنت حاسب بللي من بعد الماتش نتاع الكاميرون والبوركينافاسو ومالي والسويد السيد فهم بللي الصوصيال مايفيدش، لكن السيد مازال ماتغير فيه والو مازال يعول على ماندي اللي قاع ماراهش يلعب في الفريق نتاعو و بلايلي لعب نتاع الزنق بطيئ جدااااا، وبن ناصر اللي ناقص منافسة، و محرز الشوط الأول يمشي فوق التيران، و بوداوي اللغز اللي كي يلحق للفريق الوطني يطفى تماما ومايدير والو… بلماضي علابالو بللي النيجر رايحة تبقى اللور يعني نفس الماتش اللي حشاتهالنها فيه غينيا الاستوائية في الكاميرون ، بصح مازال ماعندوش حلول ضد الفرق اللي تلعب block bas ، ياخي لازملها لاعبين اللي عندهم السرعة ولانجيبو الخشيبات؟
شفتو يالخاوة كي دخل شايبي ؟ غير كي يلمس الكورة تعرفو بللي موهبة الله يبارك، جلوس شايبي على مقاعد البدلاء هو اهدار لثروة وطنية. بوعناني كي دخل لم يحتاج الا لكرة واحدة باش يمد تمريرة لمحرز اللي تمركز كقلب هجوم ومزية اللي جات عندو وماجاتش عند بونجاح. بوعناني باين بللي لاعب مختلف.
شفتو عمورة يالخاوة كيفاش شعل النار فيهم؟ ياهل ترى هل بلماضي يتمهبل ولا كيفاش؟
لماذا مالعبش قادري؟ اللي يحرث أرضية الملعب حرث ولماذا مالعبش توقاي؟ انا توبة كمدافع محوري يالخاوة راني شوية خايف وزاد هردو كي لعب معاه ماندي اللي قابض القاريطة في فيلاريال ومافهمتش وعلاش راح من بيتيس اصلا الى فريق غير كيماهو ؟ …. توبة جابلي ربي مليح في وضعية دفاع بثلاث محورين على الجهة اليسرى اما في حالة اربع مدافعين، فيها اللوش. وبن طالب مانخدموش السيد سويقلاص يايلعب اللور ياعرض، جامي للقدام…
نشالله بلماضي يكون فهم بالرغم بللي ماشكيتش بللي فهم، مارانيش باغي نشوف، ماندي، بلايلي، بن طالب، وبونجاح فاللقطة اللي تيراها وكان محرز وحدو، ومارانيش باغي نشوف محرز اللي يمشي فوق التيران مام حتى ويلا مركا هدف.
وسط الميدان اللي لعب ضد ايران هو أحسن وسط ، قادري بن ناصر وشايبي في مكان زرقان. أما بن طالب مع بن ناصر فمستحيل تمشي ، في زوج يساريين وماكان تفاهم بيناتهم تماما .
مهدي ليرس مليح بصح لازم نشوفوه في وضعية دفاع ضد فريق صحيح لأن الهجوم نتاع النيجر مكانش.
المقابلة كانت غنية جدا بالدروس نشالله برك يفهمها الكوتش بلماضي لأن الماتش كنا نخسروه ضد فريق احسن من النيجر غير شوية برك ونفضل انتصار dans la douleur كيما هاك غير من انتصار عريض مضلل ، بلماضي بديت نشك شوية في امكانياتو التكتيكية نتاع الدخول في الاشواط الأولى، شوية مليح في الأشواط الثانية، جابلي ربي لازملو مساعد مليح باش ينصحو شوية.
برافو شعيبي، آيت نوري وبوعناني الله يبارك لاعبين من طراز عالمي… وبرافو أرضية الميدان والجمهور 10/10.
مبروك الانتصار على الجزائر.
وماذا بيكم ماترموش الخبز بزاف وماتقووش السكاكر. والخدمة يالخاوة الخدمة……وصح رمضانكم
MB – 22.03.2023
