الفرق في نوعية المواطن

السبت هذا اللي فات كنت نقاضي فالحوايج نتوع السمانة، في وحد grande surface حذا وين نسكن، رحت من جيهة المقارون، كاين عدة انواع وماركات انا ديما نخير وحد الماركة رخيصة يسموها selection عادة تسوى 1.29 دولار للباطة لقيت باطة وحدة برك والباقي كلو من الماركات الغالية اقلها 3.69 دولار للباطة، وهو نفس المقارون يعني غير الماركة غالية بدون سبب!.
المهم جات وحد العجوزة كندية بدات تحوس على نفس المقارون وقاتلي selection كملت؟ قلتلها وقيلة كملت ، قاتلي همالا انا مانشريش المقارون هذي السمانة وابتسمت يالخاوة، ومن بعد بدات تحكيلي قاتلي ، قطعت ال cellulaire يعني الهاتف النقال ماعنديش باش نخلصو، وقطعت الانترنت، كي نبغي نكونيكتي نروح للمكتبة البلدية ، وقاتلي راني ناخذ في قرارات واش من حاجة نقدرش نشريها على حساب حاجات وحداخرين كنت نشريهم ومارانيش نقدر نشريهم، ماعنديش lechoix.
وتبتسم يالخاوة اقسم بالله غير تحكي وتبتسم، وقعدت تحكي بللي كاين جلسات في البرلمان الكندي هذو النهارات باش يناقشو قضية المضارية اللي راهي بدات يمارسوها التجار الكبار وles grandes surface هنايا في كندا ايضا يخبو السلعة ومن بعد يزيدولها فالسعر ويخرجوها، العجائن وكل المواد تقريبا ارتفعت بشكل مدهش بنسبة 100% ومن بعد قاتلي bonne journée monsieur وراحت.
غاضتني، جبدت هذيك الباطة اللي شريتها انا رخيصة وحشيتها في وسط البوايط لخرين ومن بعد عيطلتلها وقلتلها مدام راهي باقية وحدة selection اذا تشريها ومديتهالها فرحت بزاف مسكينة! وكانت تشوف للزبدة ،لقاتهم دايرينها rabais عادة تسوى 6.99 دولار للباطة وذاك اليوم حاسبينها 3.25 فقط يعني اقل من النصف، قاتلي مانيش عارفة اذا نقدر نشري زوج ولاغير وحدة ماراهمش كاتبين maximum une unité par client.
احيانا يكتبوها يقولك تشري وحدة للزبون الواحد فقط بصح لوكان تشري عشرة مكانش اللي يحاسبك ، هي محطوطة كملاحظة ومتروكة للضمير نتاع الانسان، همالا هذيك العجوز خذات وحدة فقط لانها مكانتش متاكدة هل تقدر تشري زوج!.
هنايا الفرق في نوعية المواطن حتى ولو كان مسحوقا، المواطن هنايا يشري بضمير ومايسطوكيش فالدار، بصح الحوايج نتوع العجين والسميد تقريبا ديما ناقصين، اللي يشروهم غير بوعرابن يسطوكيوهم فالصوصول
MB – 22.03.2023

اترك رد

لن يتم نشر عنوان بريدك الإلكتروني.